افتح للهوا شبابيكك


Blogger templates


الجمعة، 10 أبريل، 2015

هدفك في الحياة



أهدافك الكبيرة


قام أستاذ جامعي في قسم إدارة الأعمال بإلقاء محاضرة عن أهمية تنظيم وإدارة الوقت حيث عرض مثالا حيا أمام الطلبة لتصل الفكرة لهم.
كان المثال عبارة عن اختبار قصير، فقد وضع الأستاذ دلوا على طاولة ثم أحضر عددا من الصخور الكبيرة وقام بوضعها في الدلو بعناية، واحدة تلو الأخرى، وعندما امتلأ الدلو سأل الطلاب : هل هذا الدلو ممتلئا ؟
قال بعض الطلاب : نعم.
فقال لهم : أنتم متأكدون ؟
ثم سحب كيسا مليئا بالحصيات الصغيرة من تحت الطاولة وقام بوضع هذه الحصيات في الدلو حتى امتلأت الفراغات الموجودة بين الصخور الكبيرة ....
ثم سأل مرة أخرى: هل هذا الدلو ممتلئ ؟
فأجاب أحدهم : ربما لا ..
استحسن الأستاذ إجابة الطالب وقام بإخراج كيس من الرمل ثم سكبه في الدلو حتى امتلأت جميع الفراغات الموجودة بين الصخور ..
وسأل مرة أخرى : هل امتلأ الدلو الآن ؟
فكانت إجابة جميع الطلاب بالنفي. بعد ذلك أحضر الأستاذ إناء مليئا بالماء وسكبه في الدلو حتى امتلأ.
وسألهم: ما هيا لفكرة من هذه التجربة في اعتقادكم ؟ أجاب أحد الطلبة بحماس: أنه مهما كان جدول المرء مليئا بالأعمال، فإنه يستطيع عمل المزيد والمزيد بالجد والاجتهاد.
أجابه الأستاذ : صدقت .. ولكن ليس ذلك هو السبب الرئيسي .. فهذا المثال يعلمنا أنه لو لم نضع الصخور الكبيرة أولا، ما كان بإمكاننا وضعها أبدا.
ثمقال : قد يتساءل البعض وما هي الصخور الكبيرة ؟ إنها هدفك في هذه الحياة أو مشروع تريد تحقيقه كتعليمك وطموحك وإسعاد من تحب أو أي شيء يمثل أهمية في حياتك.

تذكروا دائما أن تضعوا الصخور الكبيرة أولا.. وإلا فلن يمكنكم وضعها أبدا..
فاسأل أخي الحبيب نفسك الليلة أو في الصباح الباكر .. ما هي الصخور الكبيرة في حياتك ؟ وقم بوضعها من الآن

الخميس، 30 مايو، 2013

زيارة رسمية


وحشتووووونى كلكم بجد بجد بلا استثناء ؛ غيبت عن التدويين كتير تقريبا أخر 3 تدوينات بين كل واحدة والتانية سنة لعله خير . 
المهم نيجى بقى على الشخص اللى جاى هنا جديد وناوى ينورنا ويشوف العالم الجديد ده.




قرر الأستاذ مؤمن محمد  ابنى الجميل انه يشرف المدونة ويسلم على الموجودين واحد واحد بالإيد وممنوع التقبيل لأن مؤمن مريض شوية ولسه فى فترة النقاهة ربنا يشفيه ويشفى كل الأطفال من الموجة اللى جاية عليهم دى .



بداية مؤمن  نور دنيتنا  يوم 10/6/2012 لازم نفتكر التاريخ ده كويس علشان قرب كل واحد يدور فى الحصالة لأن مش هقبل بهدايا أى كلام ومنعا للاحراج سيتم تفتيش الهدايا قبل الدخول أه اللى أوله شرط أخره نور ، المهم نور مؤمن الساعة 9وربع كان يوم أحد الحمد لله كانت ساعة ربنا يجعلها سهلة على كل أم حامل يارب . بجد حياة جديدة عليا وفرد زاد فى أسرتنا الصغيرة رغم إن أحيانا بتجنن من إنى مش عارفة ألاحق على ايه ولا ايه بس برجع أضحك وأقول كنت بقول امتى يجى ويملى عليا البيت شوفت معاه كتير وساعتها حسيت ماما تعبت معايا أد ايه ربنا يبارك لنا فيها ما سبتنيش أول أسبوع برغم تعبها وكمان ما انساش مامتى التانية بس حقيقى تسلمى لى يا أمى يارب يارب  يبارك لى فيك كنت بتمشى مسافة بعيدة علشان توصلى لى وتراعينى أنا وابنى بجد ربنا يحفظ كل أمهاتنا يارب ويجزيهم عنا خير . 


مؤمن ابنى طبعا زى أى طفل فى مراحل نموه ولأنه أول بيبى ليا كنت بنتظر ظهور أول سنة وأول مرة يتقلب على بطنه علشان يحبى وأول مرة يمشى واول مرة يعضنى بجد استمتعت بكل لحظة معاه ولحظات فعلا كنت ببقى مش قادرة وصعبان عليا انى مش قادرة أراعيه بشكل كويس وحاسه إنى مقصرة معاه وكل مرة يتعب فيها كان قلبى بيوجعنى أووى ولما حد يحسسنى بتقصيرى لمجرد الكلام كنت ببقى عايزة أكله باسنانى لأن الدنيا بتأزم زيادة عندى لأنى بكون حاسه بده وكلام أى حد بيزود الوجع جوايا المهم مؤمن أخد فترة الشتا بشكل صعب جدا نزلات برد شديدة وحساسية فى الصدر وجلسات تنفس وسهر طول الليل مش عارف ينام لما الشتا فات قولت خلاص هستريح وهو كمان هيستريح بس للأسف والحمد لله على كل شئ جاله دور سخونة درجة حرارته 39.5 بقيت هتجنن المهم الحمد لله ربنا هدى باباه وأخدناه  الحميات وكانوا سبب فى شفاه الحمد لله طبعا مؤمن كان كسلان خالص لا بيلعب ولا يضحك زى الأول والكل كانوا زعلانين جدا عليه بس الحمد لله بدأ يسترد عافيته ورجعت الضحكة تنور تانى فى عنيه بجد انا سعيدة إن معايا مؤمن ربنا يديمه بكل صحة وسلامة وسعادة و أمان يارب .


أتمنى إن كل واحد شافه يدعيله بالخير وكل جيله يارب ويجعل أيامه كلها خير وبركة يارب 

أســـــتــــودعـــــــكـــــم الله الــذى لا تــضـــيــــع ودائــــعــــــه

السبت، 7 أبريل، 2012

أحلى كلام لأحلى مكان .

 

طبعا وحشتونى مش عايزة كلام . اللى عايز كلام أنا فين منكم نسيتونى للدرجة دى أروح أتجوز وأقعد سنة وشوية صغنين يعنى تقوموا تنتهزوا الفرصة وتنسونى ما حال ده أنا موصياكم ومحلفاكم بكل عزيز وغالى إنكم تسألوا عن أختكم .

المهم ما علينا أحداث كتير حصلت ولسه أحداث هتحصل كانت بدايتها يوم جوازى قولتوا لى ازاى أصل أنا اتجوزت يوم 29/1/2011 وده اليوم اللى بانت فيه بشاير الثورة عقب يوم 28 طبعا اللى اتقطعت فيه كل وسائل الاتصال مش تقلقوا عدت بسلامن اتجوزت وروحت بيتى بسلام ومش حصل لنا مشاكل بخلاف انى اتحبست فى الكوافير أنا وأربع عرايس غيرى وطبعا واحدة واحدة كان عريس ورا التانى بيجى ياخد عروسته وخلصوا العرايس ومش باقى غيرى زوجى العزيز اتأخر لأن الطريق بتاعنا كان واقف . ناهيكم بقى عن أصحاب الكوافير مرعوبين لأن المظاهرات ماشية وفى دسائس وسطيها بتعمل أحلى واجب فى المحلات المفاجأة بقى ان الاتصال فى محافظتنا كان شغال تمام بينا وبين بعضينا فى المنوفية فقط إنما أى محاولة اتصال بخارج المحافظة كان لايمكن المهم الجميع فى انتظار العريس والحمد لله وصل بسلام وأخدنى علشان نروح البيت كان فرحنا على الضيق مقتصر على الأهل وبعض الأصحاب اللى مفيش منهم حد وصل للأسف لأن الكل خايف يخرج من الأحداث اللى حصلت وشهر العسل اتقضى فى البيت لأننا خوفنا نسافر البلطجية يوجبوا معانا زى ما حصل مع اللى قرروا يسافروا يوم الفرح علشان يرجعوا لبيوتهم وأشغالهم .



انقضت الأجازة وقررنا نخرج نزور الأهل وخرجنا روحنا عند بابا رجعنا لقينا مبارك اتنحى فى يومها ساعتها حسيت إننا أسرة فعلا وشها حلو ( وش بيضحك بخبث) . الحمد لله ربنا أكرمنا وبقى فى بيبى بيلعب جوا وبقى عنده سبع شهور وبدأنا فى الثامن أهو ماشاء الله الخبر بقى الأجمل إن الدكتورة بتاعتى بتقول إن حسب الحسابات والله أعلم إنه هيشرف إن شاء الله فى شهر يونيو (6) المفاجأة إن الشهر ده أحداثه مهمة جدا أولاً النطق بالحكم على مبارك ثانياً انتخابات الرئاسة - مش بقولكم أسرة وشها حلو .

أخيراً وإن شاء الله مش آخراً بدعو الله إن اللى جاى يكون أحلى لأولادنا ويارب يجعل أيامهم كلها رخاء وأمن وأمان ويسر لنا جميعاً أمورنا . الـــلـــــــهـــــــم آمـــــيــــــن.

أرجو منكم الدعاء لى بالخير وأن يظل الود بيننا والخير

السبت، 8 يناير، 2011

وبدأ العد التنازلى


طبعا مرعوبة ودى عايزة سؤال مش باقى على فرحى غير 20 يوم بجرى فى مليون اتجاه بسرعة رهيبة مش لاحقة اتكلم مع حد برغم إنى معظم الوقت فى البيت بس عقلى مشتت فى كذا اتجاه وطبعا وزنى زاد وعايزة أنزل شوية هما حاجة بسيطة بس متعقدة الحمد لله باقى أنزل أدور على الفستان وأحجز الكوافير الوقت بيجرى منى بسرعة جدا بس هعمل ايه يادوب لسه راجعة من ألكس ربنا ييسر الحال ويتمم على خير

نسيت أقولكم وحشتوووووووووووووووونى كتييييييييييييييييييييير أكيد إنتم مقدرين الهوسة اللى أنا فيها عارفة إنكم فرحانين ليا بجد ربنا يخليكم ليا وما يحرمنى منكم أبدا حقيقى بحس إنى فوق السما وأنا بينكم ربنا ما يحرمنى من وجودكم معايا أبدا يارب ومن هذا المزنق أحب أقولكم اللى هينقط مش هقبل بأقل من 1000 مليون مبروووك أما أشوف مين هيزود

♥ ♥ ♥ ♥ ♥ بــــــــــحـــــبــــــكـــــــم كــــــلــــــكــــــم ♥ ♥ ♥ ♥ ♥

متنسوش ترجعوا تانى هستناكم

Template by:

Free Blog Templates